Joe 2 | NdeIBE | STEP | Vuthelani icilongo eZiyoni; hlabani umkhosi entabeni yami engcwele. Bonke abahlala elizweni kabathuthumele, ngoba usuku lukaJehova luyeza. Selusondele, selufikile

Joel 2

Umtshitshi wezintethe

1 Vuthelani icilongo eZiyoni; hlabani umkhosi entabeni yami engcwele. Bonke abahlala elizweni kabathuthumele, ngoba usuku lukaJehova luyeza. Selusondele, selufikile –

2 usuku lomnyama lokudana, usuku lwamayezi lobumnyama. Njengokusa kusendlaleka phezu kwezintaba, liyeza ibutho elikhulu elilamandla elingazange libe khona endulo kumbe libe khona eminyakeni ezayo.

3 Phambi kwabo umlilo uyatshisa, ngemuva kwabo amalangabi ayavutha. Phambi kwabo ilizwe linjengensimu yase-Edeni ngemuva kwabo yinkangala elugwadule – akukho okubaphunyukayo.

4 Bakhangeleka benjengamabhiza; bamatha njengamabhiza empi.

5 Ngomsindo onjengowezinqola zempi bayeqa phezu kwezingqongo zezintaba, njengomlilo ochachambayo utshisa izinhlanga, njengebutho elilamandla selilungele impi.

6 Ekubaboneni nje, izizwe zizwa ubuhlungu; ubuso bonke buyadana.

7 Bahlasela njengamaqhawe; bakhwele imiduli njengamabutho. Bonke bahamba beludwendwe bengaphambuki endleleni yabo.

8 Kabasunduzani; lowo lalowo uhamba eqonde phambili. Badabula phakathi kwezivikelo kungekho kwehlukana kubo.

9 Baya ngesiqubu edolobheni; bagijima besekele umduli. Bayakhwela bangene ezindlini; bangena ngamawindi njengamasela.

10 Umhlaba uyanyikinyeka phambi kwabo; umkhathi uyaqhaqhazela, ilanga lenyanga kube mnyama, lezinkanyezi kazisakhanyisi.

11 UJehova uyakhwaza phambi kwebutho lakhe; amabutho akhe angeke abalwe, njalo balamandla labo abalalela ukulaya kwakhe. Usuku lukaJehova lukhulu; luyesabeka. Ngubani ongalumela na?

Dabulani izinhliziyo zenu

12 “Lakhathesi,” kutsho uJehova, “phendukelani kimi ngezinhliziyo zenu zonke, ngokuzila langokukhala lokulila.”

13 Dabulani izinhliziyo zenu hatshi izigqoko zenu. Buyelani kuJehova uNkulunkulu wenu, ngoba ulomusa lesihawu, uyaphuza ukuthukuthela njalo ulothando olukhulu, njalo uyaxola ukuthumela umonakalo.

14 Ngubani owaziyo? Engxenye angaphenduka abe lesihawu atshiye isibusiso – iminikelo yamabele leminikelo yokunathwayo kaJehova uNkulunkulu wenu.

15 Vuthelani icilongo eZiyoni, memezelani ukuzila okungcwele, bizani ibandla elingcwele.

16 Buthanisani abantu, ngcwelisani ibandla; hlanganisani abadala, buthanisani abantwana labo abamunyayo. Umyeni katshiye indlu yakhe lomlobokazi atshiye ikamelo lakhe.

17 Abaphristi abakhonzayo phambi kukaJehova, kabakhale bephakathi laphakathi kwekungeneni kwethempeli le-alithare. Kabathi, “Awu Jehova, bayekele abantu bakho. Ungenzi ilifa lakho libe yinto yokuhlekwa, isiga phakathi kwezizwe. Kungani phakathi kwezizwe kumele bathi, ‘Ungaphi uNkulunkulu wabo?’ ”

Impendulo kaJehova

18 Lapho-ke uJehova uzakuba lobukhwele ngelizwe lakhe abe lesihawu ebantwini bakhe.

19 UJehova uzabaphendula athi: “Ngiyalithumela amabele lewayini elitsha lamafutha, okwaneleyo ukulisuthisa ngokugcweleyo; angiyikuphinda futhi ukulenza into yokuhlekisa ezizweni.

20 “Ibutho lasenyakatho ngizalixotshela khatshana lani, ngilifuqele elizweni elomileyo elilugwadule, amaviyo alo aphambili esiya olwandle lwasempumalanga lawo angemuva esiya olwandle lwasentshonalanga. Iphunga lalo elibi lizakuya phezulu, umnuko walo uzaphakama.” Ngempela usenze izinto ezinkulu.

21 Ungesabi, wena lizwe; thaba uthokoze. Impela uJehova wenze izinto ezinkulu.

22 Lingesabi, lina zinyamazana zeganga, ngoba amadlelo asesiba luhlaza. Izihlahla sezithela izithelo zazo; imikhiwa lemivini kuthela kakhulu.

23 Thabani, lina bantu baseZiyoni, thokozani kuJehova uNkulunkulu wenu ngoba ulinike izulu lekwindla ngokulunga. Ulilethela izulu elinengi kanye lezulu lekwindla lelentwasa, njengakuqala.

24 Iziza zizagcwala amabele; izikhamelo zizaphuphuma iwayini lamafutha.

25 “Ngizalihlawula okwaleyo minyaka lokho okwadliwa zintethe, lesikhonyane lobuyane, ezinye izintethe kanye lemitshitshi yezintethe – ibutho lami elikhulu engalithumela kini.

26 Lizakuba lokudla okunengi lize lisuthe, njalo lizadumisa ibizo likaJehova uNkulunkulu wenu, olenzele izimangaliso; abantu bami kabayikuphinda bayangeke futhi.

27 Ngakho lizakwazi ukuthi ngiko-Israyeli, lokuthi mina nginguJehova uNkulunkulu wenu, kanye lokuthi kakho omunye; abantu bami kabayikuphinda bayangeke futhi.

Usuku lukaJehova

28 “Emva kwalokho, ngizathela uMoya wami ebantwini bonke. Amadodana enu lamadodakazi enu azaphrofetha, abadala benu bazaphupha amaphupho, izinsizwa zakini zizabona imibono.

29 Lakuzinceku zami, ezesilisa lezesifazana, ngizathela uMoya wami ngalezonsuku.

30 Ngizabonakalisa izimangaliso emazulwini lasemhlabeni, igazi lomlilo lezikhatha zentuthu.

31 Ilanga lizaphendulwa libe ngumnyama lenyanga ibe ligazi phambi kokuba kufike usuku olukhulu lukaJehova olwesabekayo.

32 Njalo loba ngubani okhuleka ebizweni likaJehova uzasindiswa; ngoba eNtabeni iZiyoni leJerusalema kuzakuba lokukhululwa njengoba uJehova etshilo, phakathi kwabasindileyo labo ababizwa nguJehova.